А. ҒИНИЯТ АҚМОЛА ОБЛЫСЫНДАҒЫ БІРҚАТАР МЕДИЦИНАЛЫҚ НЫСАНДАРДЫҢ ЖҰМЫСЫМЕН ТАНЫСТЫ
Ақмола облысына жұмыс сапары барысында Денсаулық сақтау министрі Ажар Ғиният Ақкөл қаласындағы аудандық ауруханаға, Новорыбинка ауылындағы дәрігерлік амбулаторияға және Көкшетау қаласындағы Көпбейінді облыстық аурухана құрамындағы перинаталдық орталыққа барды.
Ақкөл аудандық ауруханасының негізгі ғимараты 1968 жылы салынған, мекеменің жобалық қуаты тәулік бойы жұмыс істейтін 80 төсекке және күндізгі стационардың 70 төсегіне есептелген. Бүгінде мұнда 54 дәрігер, 169 орта медициналық қызметкер, 69 кіші медициналық персонал жұмыс істейді.
Министр аурухана басшылығымен бейінді мамандардың тапшылығы мәселесін талқылап, оларды шарттық негізде белгілі бір күндері Астанадан бірлесіп орындаушылар ретінде шақыруды ұсынды.
Аурухананың негізгі ғимаратының тозуын ескере отырып, Денсаулық сақтау министрлігінің басшысы жаңа корпустың құрылысын қаржыландыруға көмектесуге уәде берді.
«Біз бүгін бірінші кезекте ауылдық денсаулық сақтауды жаңғырту жөніндегі жобаны дамытатын боламыз. Бұл біздің бірлескен үлкен міндетіміз, екі жыл ішінде ауылдық жерлерде 655 денсаулық сақтау нысанын салу, оның ішінде 38-ін осы облыста салу жоспарланған. Біз оларды сапалы түрде дайындап, халықты оңалтуға және жалпы сауықтыруға, МСАК — ты дамытуға көбірек көңіл бөлуіміз керек», — деп А.Ғиният Ақкөл ауданының медициналық жұртшылығына сөйлеген сөзінде атап өтті.
«Ауыл тұрғындары тыныс алу, ас қорыту, несеп-жыныс жүйелері патологияларынан зардап шегуде, бұл қала тұрғындарының сырқаттанушылық құрылымынан ерекшеленеді. Біз үшін өткір аурулардың созылмалы түрге айналуының алдын алу, тиімді профилактикалық тексерулердің көмегімен ауруларды ерте кезеңде анықтау маңызды», — деп министр ұлттық жобаны іске асырудың негізгі мақсатына тоқталды.
Бұдан әрі министр медицина қызметкерлерін дәрігерлердің, медбикелер мен қосалқы қызметкерлердің жалақысын кезең-кезеңімен көтеру, жедел жәрдем жұмысындағы жаңалықтар, дәрігерлердің кәсіби жауапкершілігін сақтандыру механизмі арқылы медицина қызметкерлерінің құқықтық қорғалуы туралы хабардар етті.
Дәрігерлер қайта қарауды қажет ететін хирургиялық бейіндегі қызметтерді көрсету шарттарына қатысты сұрақтар қойып, арнайы мамандарды қайта даярлау жөнінде ұсыныстар енгізді.
Ақкөл ауданының аумағында ведомство басшысы 2 мың халқы бар Новорыбинка ауылындағы дәрігерлік амбулаторияға барды, онда ұлттық жоба шеңберінде жаңа ғимарат салу көзделуде.
«Науқасты басқа қалаға немесе Астанаға алыс қашықтыққа диагностикалауға жібермеу үшін телемедицинамен жұмыс істеу дағдыларын меңгеру керек, біз өз тарапымыздан ауылдық дәрігер үшін жаңа ФАП ғимаратын барлық қажетті құрал-жабдықтармен, соның ішінде жаңа көлікпен қамтамасыз етеміз», — деді А.Ғиният ауылдық дәрігерлік амбулаторияның аға дәрігері Қасым Қалыдбайұлына.
Келесі нысан Көкшетау қаласындағы перинаталдық орталық болды, онда министр балалар реанимациясы бөлімшесінің және жаңа туған нәрестелер патологиясы бөлімшесінің және шала туылған нәрестелерді күтудің екінші кезеңінің жұмысымен танысты.
Жергілікті Денсаулық сақтау басқармасының мәліметінше, Ақмола облысының 736 мың тұрғынының жартысынан көбі әйелдер, оның ішінде 199 мыңы бала көтеру жасындағы әйелдер.
Министр облыс бойынша ана мен баланы қорғау қызметінің үйлестірушісі рөлін атқаратын ПО басшыларының назарын тәуекел тобындағы әйелдерді қадағалау қажеттілігіне, ауыр жағдайлардың, созылмалы аурулардың өршуінің алдын алу үшін оларды уақтылы тексеруге аударды.
«Жүкті әйелдерді нақты үйлестіріп, олардың денсаулығы үшін алдын алу шаралары уақытылы қабылданғанда әйелде ана мен баланың өміріне қауіп төндіретін бірқатар қатар жүретін аурулар бар екенін дәл босану кезінде білмейтін едік, осылайша әйелдерімізден де айырылмас едік», — деп Денсаулық сақтау министрлігінің басшысы перзентхана басшылығымен әңгімелесу барысында атап өтті.
