Көкшетауда Жеңістің 80 жылдығы аталып өтуде: тағзым, мақтаныш және алғыс күні
Көкшетауда Жеңістің 80 жылдығы аталып өтуде: тағзым, мақтаныш және алғыс күні
Көкшетау қаласында Ұлы Жеңістің 80 жылдығына арналған мерекелік іс-шаралар жалғасуда. Таң атқалы қалада ерекше рух, елдік пен ерлікке толы көңіл-күй орнады. Қала тұрғындары мен қонақтары орталық алаңдарға жиналып, ескерткіштерге гүл шоқтарын қойып, соғыс ардагерлерінің естеліктерін тыңдап, көрмелер мен концерттерге қатысуда.
Бүгінгі күннің маңызды шараларының бірі — «Мәңгілік алау» мемориалына гүл шоқтарын қою рәсімі болды. Бұл шараға Көкшетау жұртшылығы, ардагерлер, мектеп оқушылары, әскери қызметкерлер мен жергілікті билік өкілдері қатысты. Салтанатты жиында Ақмола облысының әкімі Марат Ахметжанов сөз сөйледі:
«Бүгін біз адамзат тарихындағы ең маңызды күндердің бірі — Жеңіс күнін атап өтудеміз. Бұл — батырлық пен жанқиярлықтың, Отанға адал қызмет етудің символына айналған ұлы мереке. Біз аталарымыз бен әкелеріміздің ерлігін, сол бір қиын-қыстау замандардағы төзім мен қайсарлықты еске аламыз. 80 жыл бұрын адамзаттың ең қанды соғысын тоқтатқан ерлерге бас иеміз. Ақмолалықтар Мәскеу, Сталинград, Курск түбіндегі шайқастарда жанқиярлық танытты. Бүгінде 66 жерлесіміз – Кеңес Одағының Батыры және Даңқ орденінің толық иегерлері. Біздің міндет – осы ерлікті ұмытпау, бейбітшілікті сақтау, бірлікті қорғау және осы аманатты болашақ ұрпаққа жеткізу. Құрметті ардагерлер, сіздерге мың алғыс, ал мәңгілікке кеткен батырларымызға – мәңгілік тағзым!», деді ол.
Мерекенің қарсаңында облыс әкімі соғыс ардагерлерін арнайы барып құттықтап, оларға құрмет медальдарын табыстады. Майданда және тылда еңбек еткендерге ризашылығын білдіріп, олардың ерлігі мен еңбегін жоғары бағалады.
Осы күннің әсерлі сәттерінің бірі – Ақмола облысы мемлекеттік кірістер органдары ардагерлер кеңесінің төрағасы Теңбай Сафиюллинұлы Ибраевтың естелігі болды. Оның әкесі соғыс жылдары майданда болған:
«Жеңіс күні – бұл шын мәнінде ұлы мереке. Әкелеріміз соғыста шайқасты, біз – балалар, тылда еңбек еттік: ауылда, колхозда жұмыс істедік. Біз әкені, Жеңісті күттік. Осы күннің маңызын жастар да ұғынып, бағалай білуі тиіс. Соғыстың қайта оралуына жол жоқ. Тек бейбіт өмір болсын. Біздің көк туымыз мәңгі биікте желбірей берсін», деп тілегін білдірді ардагер.
Көкшетаулықтар мен қала қонақтары бүгін «Жеңіс батырлары» және «Ұлы Отан соғысы жылдарындағы Ақмола» атты фотокөрмелерді тамашалап, соғыс жылдарындағы қазақ батырларының ерлігіне арналған «Ерліктің ерен үлгісі» атты театрландырылған қойылымды көрді.
Кешкі уақытта мерекелік шаралар жалғасады. Қаланың орталық алаңында 200 жұптың қатысуымен «Жеңіс вальсі» биленіп, шығармашылық ұжымдар концерт қойып, вокалдық ансамбльдер патриоттық әндер орындайды. Кештің соңында алғыс пен мәңгілік естелікке толы музыкалық шоу өтеді.
Аймақ көлемінде биыл Жеңіс күніне орай 100-ден астам іс-шара ұйымдастырылып отыр. Олардың қатарында театр премьералары, әдеби байқаулар, естелік акциялар, халық театрының ашылуы және «Әлия» спектаклінің тұсаукесері бар. Бұл мереке – ұрпақтар сабақтастығын, ел жадындағы ерлікті, Тәуелсіздікке апарған күрестің құндылығын еске салады.
