Ақмола облысында инфекциялық сырқаттанушылықтың төмендеуі байқалады
Ақмола облысында инфекциялық сырқаттанушылықтың деңгейі жалпы алғанда төмендеуде, бұл әсіресе COVID-19 және туберкулез сияқты көптеген ауруларға қатысты айқын көрініс тапты. Дегенмен, соңғы уақытта қызылша мен көкжөтел жағдайларының артуы байқалуда. Эпидемиологтар вакцинация науқанының күшеюін атап өтіп, бірақ вакцинациямен қамту әлі де ДДҰ-ның ұсынылған деңгейінен төмен екенін білдірді. Бұл туралы облыстық санитарлық-эпидемиологиялық бақылау департаментінің басшысы Айнагүл Мусина брифингте мәлімдеді, деп хабарлайды Өңірлік коммуникациялар қызметінен.
Ақмола облысында 2024 жылдың 10 айында эпидемиологиялық жағдай салыстырмалы түрде тұрақты, алайда қызылша мен көкжөтелден басқа сырқаттанушылықтың төмендеуі байқалады. Мысалы, COVID-19 бойынша сырқаттанушылық өткен жылдың сәйкес кезеңімен салыстырғанда 86 есеге төмендеген.
“Туберкулез, скарлатина және басқа жедел ішек инфекцияларында да айтарлықтай төмендеу байқалды: туберкулез 2 есе, скарлатина 10%-ға азайған. сонымен қатар, лайма ауруы мен эпидемиялық паротит деңгейі 4 есеге дейін төмендеді”, дейді жауапты маман.
Алайда, өңірде қызылша мен көкжөтелге қатысты жағдайлар алаңдаушылық туғызып отыр. Көкжөтелмен сырқаттанушылық 9,3 есе артқан, және бұл жағдайлардың 94%-ы 14 жасқа дейінгі балалар арасында тіркелген. Бұл балалардың көпшілігі вакцинация алмаған. Қызылша жағдайларының бастапқы кезеңде күрт өсуі байқалғанымен, қазан айында бұл жағдайлар толығымен тоқтаған. Қаңтар айында қызылша бойынша 229 жағдай тіркелсе, қазан айында олардың саны нөлге теңескен.
Ақмола облысында A вирустық гепатитімен сырқаттанушылық 1,2 есе артқан, жалпы вирустық гепатиттердің жағдайы да 1,9 есе өскен. Эпидемиологтардың айтуынша, вакцинациядан бас тартатын ата-аналардың саны 70%-дан асады, бұл халықтың вакцинацияға қатысты ақпараттандыру деңгейінің жеткіліксіздігін көрсетеді.
Жедел респираторлық вирустық инфекциялар мен тұмау жағдайлары да әлі де шиеленісті болып отыр. 2024 жылдың эпидемиологиялық маусымында ЖРВИ-дің 41 мыңнан астам жағдайы тіркелген. Инфекцияға әсіресе 14 жасқа дейінгі балалар ұшырайды, олар барлық жағдайлардың 72%-ын құрайды. Пневмония жағдайларының саны өткен жылмен салыстырғанда 1,9 есе көбейген, бұл да үлкен алаңдаушылық туғызады.
Ақмола облысында тұмауға қарсы вакцинация маңызды рөл атқарады. Ағымдағы маусымда 97 мыңнан астам адам тұмауға қарсы егілген, оның ішінде 6 930 медицина қызметкері бар. Дегенмен, профилактикалық егулердің қамтуы 76,5%-ды құрап отыр, бұл ДДҰ ұсынған деңгейден әлі де төмен. Сонымен қатар, қыркүйек айынан бастап адам папилломавирусына қарсы вакцинация науқаны басталып, 11 жастағы қыздар мен 12-13 жастағы қыздарды иммундау жоспарланған. Осы күнге дейін 3 354 қыз вакцинацияланып, жоспардың 52,3%-ы орындалған. Вакцинацияланған қыздар арасында қолайсыз көріністер тіркелмеген.
Епидемиологтар жұқпалы аурулардың алдын алу және вакцинация науқандарына белсенді қатысуға шақырады. Сонымен қатар, инфекциялардың таралуын болдырмау үшін арнайы алдын алу шараларын сақтауға, оның ішінде үй-жайларды жиі желдетіп, ылғалды тазалауды жүргізуге және жаппай іс-шаралардан аулақ болуға кеңес береді.
Вакцинация деңгейінің арттырылуы мен халықпен белсенді ақпараттық жұмыс жүргізу қызылша мен көкжөтел сияқты аурулардың өсуін тоқтатуға және инфекциялық аурулардың таралуын одан әрі азайтуға мүмкіндік береді.
Вакцинация — өзіңізді және жақындарыңызды жұқпалы аурулардың ауыр зардаптарынан қорғаудың ең тиімді әдісі болып табылады
